O TSXUE fai historia cunha nova sentenza que obriga a todos os estados membro a
recoñecer os matrimonios homosexuais, podendo impoñer sancións aos países que
incumpran a medida.

Na súa sentenza do 25 de novembro de 2025, o Tribunal Superior de Xustiza da Unión
Europea decidiu que todos os estados da UE deben recoñecer os matrimonios entre persoas
do mesmo sexo celebrados legalmente noutro país membro, sen depender de que a súa
lexislación nacional inclúa o matrimonio igualitario.
Esta decisión representa un fito histórico para os dereitos das persoas LGBTI: a negativa de
recoñecer un matrimonio válido fóra do propio país vulnera dereitos fundamentais como a
liberdade de circulación, o dereito de residencia, o dereito a ter vida familiar e privada, e a
igualdade ante a lei.

O impacto no ámbito laboral e social

•  Dereitos laborais e de familia: O recoñecemento do matrimonio afecta dereitos como
  os de permisos por coidado familiar, pensións de viuvez/orfandade, persoas
  beneficiarias no seguro de saúde ou de accidentes, fiscalidade conxunta, etc. Para as
  persoas LGBTI que teñen parella, isto pode supor unha garantía real de protección e
  igualdade no emprego e na vida cotiá.

• Mobilidade e emprego transnacional: Moitas familias LGBTI teñen mobilidade
  internacional por cuestións laborais ou de estudos. A sentenza asegura que o estatuto
  conxugal sexa recoñecido sen discriminación, o que facilita o dereito a residencia, a
  libre circulación e emprego dentro da UE sen que a condición de parella supoña un
  obstáculo legal.

• Normalización da diversidade familiar: O recoñecemento institucional contribúe a
  visibilizar modelos de familia diversos. Esa visibilidade non só beneficia ás parellas,
  senón que axuda a combater prexuízos e discriminacións latentes no mundo laboral.

Que implica, e que queda por facer

A sentenza obriga ao recoñecemento, mais non obriga a cambiar a lexislación doméstica
sobre o matrimonio. Iso significa que algúns estados poderán seguir sen ofrecer un marco
interno propio de matrimonio igualitario, aínda que deberán recoñecer os matrimonios
contraídos noutros países da UE.
Deste xeito, nun contexto de cada vez maior mobilidade internacional, as empresas e
institucións galegas deben ter presente esta realidade diferencial entre estados. Se ben a
sentenza axuda a protexer os dereitos da cidadanía galega habitando noutros países da
Unión Europea, as limitacións de dereitos e bonificacións a matrimonios legalmente
constituídos poden supoñer unha discriminación cara persoas que se mudaron a Galicia
desde países nos que non está permitido o matrimonio entre persoas do mesmo sexo.
A decisión do TSXUE é un avance decisivo cara á igualdade de dereitos das persoas LGBTI
en Europa. Pero transformala en igualdade real require compromiso: tanto da administración
como das empresas e, sobre todo, do conxunto da sociedade.