As persoas trans son un colectivo que afronta barreiras estruturais no acceso ao mercado laboral, así como dificultades para manter postos de traballo estables. As empresas e administracións públicas teñen a responsabilidade de acompañalas e apoialas na súa transición médica.
A Consellería de Sanidade da Xunta de Galicia ven de publicar en abril de 2025 un documento de recomendacións para a atención sanitaria de persoas trans que acoden aos servizos de Atención Primaria no SERGAS. Non todas as persoas trans desexan someterse a procedementos médicos para adecuar o seu corpo á súa identidade de xénero, mais nos casos nos que esta é unha parte importante do seu proceso de transición isto non debería supoñer un conflito no seu posto de traballo.
O compromiso coa igualdade de trato e de oportunidades no ámbito laboral require ter en conta as diversas realidades das persoas traballadoras, incluíndo as necesidades específicas do colectivo trans. Neste senso, é importante que as organizacións recoñezan e garantan o dereito das persoas trans a acceder, en condicións de igualdade, aos coidados médicos relacionados coa súa identidade de xénero.
Durante un proceso de transición médica, unha persoa trans pode precisar acudir regularmente a consultas médicas, tratamentos hormonais ou sesións de seguimento sanitario. Estas citas, que moitas veces deben realizarse durante o horario laboral, implican a necesidade de dispor de permisos puntuais que permitan compatibilizar a vida laboral coa atención á saúde.
Así mesmo, en determinados casos, as persoas trans poden optar por someterse a intervencións cirúrxicas de afirmación de xénero. Estes procedementos requiren, ademais dunha planificación previa, un período de recuperación postoperatoria que pode traducirse nunha baixa médica de duración variable, dependendo do tipo de intervención e das condicións de saúde da persoa.
É fundamental que as empresas e entidades empregadoras aborden estas situacións dende unha perspectiva de apoio e respecto, garantindo que as persoas trans poidan exercer os seus dereitos laborais e sanitarios sen discriminación. Neste contexto, algunhas recomendacións son:
- Aplicar con sensibilidade e flexibilidade as normativas sobre permisos laborais e baixas médicas.
- Manter a confidencialidade da información relacionada coa saúde e identidade da persoa traballadora.
- Establecer protocolos internos que contemplen a diversidade de xénero e promovan un clima laboral inclusivo e seguro.
Promover espazos de traballo respectuosos coa diversidade implica tamén recoñecer que o acceso a unha atención médica adecuada forma parte do dereito á saúde e ao benestar das persoas traballadoras. A inclusión real require accións concretas, e a adaptación dos tempos e recursos laborais ás necesidades do colectivo trans é unha medida fundamental para avanzar cara a unha igualdade efectiva.
As empresas interesadas en contar con máis información sobre como adaptarse e acompañar ao seu persoal trans e non binario poden consultar o texto correspondente no apartado de “Boas Prácticas” da web de Diversidade Laboral: https://diversidade.aigualdadelaboral.gal/apoio-na-transicion-de-xenero/